खेळणी

 खेळणी

वारीच्या गर्दीत
बापाने खांद्यावर घेतलं मुलाला
वासुदेवाने नदी लोट्ल्यासारखी
त्याने सारली हिम्मतीने गर्दी
आणि ठेवले  तुकारामाच्या पालखीवर हात .
फिरवले मुलाच्या तोंडावरूनही.
मुलगा त्याच्या तालात गुंग
वारकरी त्यांच्या तालात गुंग .
पुन्हा आपली गर्दी सारून
बाप आला आपला मागे
मुलाला खांद्यावर घेवूनच .
आणि थांबला एका खेळण्याच्या दुकानासमोर
मुलासाठी .मुलाच्या आनंदासाठी .
मुलगा म्हणाला ,बाबा ही  खेळणी नको
मला बंदूक पाहिजे .
नाहीतर  चमकणारी तलवार द्या .
बाप म्हणाला नको ,नको
ही शिट्टी घे ,फुगा घे.
मुलगा म्हणाला नाही .
मला बंदुकच पाहिजे नाहीतर तलवार
नाहीतर हा भुताचा मास्क द्या.
बाप बघत राहिला मागे वळून  
तुकारामाची पालखी गर्दीत दिसेनाशी होत होती.